Hard Times

Noo things haenae bane ower aisy for maist o is lately wae yin thing ir anither.

Iverythin is aye gettin dearer, work is as rare as hen’s teeth an thaur seems tae bae nae licht at the enn o tha tunnel. Noo am sure wae wud a lake somethin tae lift oor spirits this coul waather. Hooiniver, yin thing that galls mae is whun tha folk wha ir weel heeled stert tae mak little o yins wha ir naw sae weel aff.

Am takin aboot tha soart that wid tell is tha wye wae shud a maak enns meet an pit a bit by fir a renny dey. Mann, its a richt fur them in thaur big hooses an thaur swanky kars tae turn up thaur nebs an point thaur fingirs. But A sae let them leeve fur a year ir sae wae nae jab o work an see if they wud feel tha saim wye. Noo ye micht wunner why am rammelin on in this mode but A hae saa guid times an bad times throughoot mae ain time here on airth.

A know what it feels lake tae bae throod oot o wurk an rin kep in han beggin fur a deys wurk. It naw ower nice an A niver wull forget them times sae A think a wile peety o onyboady wae a femelie wha haes bane tryin tae fin wurk, for as a boady a know sed yin dey sure ye cudnae buy wurk. Noo dinnae get it intae yer heid that baakin tha twarthy amang is wha widnae tak wurk if it wus brocht tae them on a siller plate. Noo wae this shoart epistle on wurk an tha shoartage o’t A wud lake tae lee yese a wae a wee bit an oul rhyme frae roon aboot 1900 that wus scrieved bae a boady caa’d Thomas Given.

How aisy ‘tis for men tae preach

Whun riches they hae got,

An’ wae self-interest’s purse-hurt screech,

Ca’ us a sinfu’ lot.

But, haud a wee! ye men o’ wealth!

Though noo for breath yer pantin “

We ax nae favours gained by stealth-

It’s justice that we’re wantin’-

Nae mair this day.

Thats a fur noo freens, an boys A wus jest thinkin Aister wull shane weer roon sae hoke oot yer sun bonnets fur ye niver know wae micht hae oor simmer waather then.

Tha Poocher Merch 2013.