Ullans September article

Draft boords an wull socks.

Boys a boys but time shane gaes by, an wur still hingin on hopin wae wull get a simmer. Weel wae micht get yin but a kannae see it baein this year onywye.

Dae ye know this, a wus jest switherin tha ither dey aboot oul times an tha wye things wur far mair aisy gan than they ir noo-a-deys. A mine in tha lang wunther nichts folk roon aboot wud hae passed tha time wae simple things. Tha game o drafts wus a graet thing baak then, monies an oor wus spent plaein this wae tha licht o tha tilley lamp. It wus a very sayrious thing an whiles ye cud hae har’d a pin drap as tha nixt move wus planned. Aff coorse thaur wus Dominoes an Darts as weel.

Forbye tha games that wud hae bane plaed mony an evenin, aye deed whiles intae tha airlie oors, tha time wud hae bane whiled awa tellin yarns an a bit o fiddle music an in tha odd place maebae a bit o square dancin roon tha hearth. Aff coorse tha nicht wud aye hae finished aff wae a guid moothfa o tay mair an lakely aye made bae tha wumman o tha hoose. Noo tha weemen wud hae had dane things that athagither a loc mair usefa, things lake knittin, aa soarts o things, even socks that wur knit usin fower needles.

Noo in tha simmer wather in tha lang evevins if ye wurnae in tha moss ir daein a wee turn in tha garden ye micht tried cloddin horse shoes at tha road enn, ir jest sut doon on a dake sumwhaur wae yin ir twa o yer freens an see wha cud hae toul tha biggest lie.Noo here an there ye micht hae got pitch an toss but it wus mair a toon thing an deed monies a boady loast mair nir hes kep at that oul caper. Sae A hope am forgeen for taakin aboot tha oul times, for tae me they wur tha times A still mine an think they wur, in mae heid onywye ‘tha guid oul deys’. Even yit wun A get ony excuse ava A wud sit doon at a dake baak an let mae mine taak mae baak tae deys o drafts an peat fires. Aa fur noo, mine an Keep it Ullans.

Tha Poocher Sept 2012