Ullan’s August article

0
Have your say

Wat wather an oul wurds

Boys but tha waather wud seeken ye, if its naw stertin tae renn its haes jest stapped. Whaur is tha simmer onywye that is tha queshun iveryboady is axin.

Weel noo, a think as a boady a know weel sed tae me tha ither dey, ‘if it wud stap rennin it wud bae a guid dey’. He hut the nel on tha heid for wae hae had a wat simmer aff an on. Aff coorse lakely it cud hae bane warse for tha hale wurl is awa wae it, floods ir plentifa an then tha craps ir deein for tha want o renn in pairts o Ameriky.

Hooiniver, tha Twalth dey wus a brev dey an that wud hae made a wheen is happy onywye. A went alang maesel tae see hale event an a wus sae gled that thaur wus nae hannlins roon oor dures onywye.

It wus nice tae see tha weans an aa sae happy an tha ouler boys wha lake maesel irna fit tae waak onymair wavin’ oot o kars an minibuses, jest beamin wae pride tae bae pairt o tha celebreshuns. A think maesel is Ulster Scots shud bae proud tae celebrate oor heritage an culture an for a brev wheen o is tha twalth is pairt o wha wae ir. Noo, maebae iveryboady whudnae agree, but for maesel A think whiles it is mich betther tae bae hated for wha ye ir nir laked for wha yer naw. Jest think aboot that noo .

Noo that A hae got mae wee rant oot o tha road A wus jest switherin tha ither dey aboot tha wye a lot o oor native speakers hae stappin usin some tha oul wurds tha wud hae bane used in mae granfeythers time.

Words lake,ken, kent,aiblins,stannins,behopes,bose, bulyor,jirkin. These ir ony yin ir twa that ir floatin through mae heid an aff coorse A cud bae wrang but jest think baak tae yer young deys an ye micht bae able tae mine a guid wheen that yer grann y micht hae used iverydey. Maebae oor tongue changes through tha passin o time but A think it wud bae nice try an keep as mony o tha oul wurds in use. Becaase if it wus guid eneuch for mae granfeyther is guid eneuch for me. Aa for noo an mine an keep yer heid dry.

Tha Poocher Augast 2012.